六月‧ 戒煙月

【六月。戒煙月起動！】

六月戒煙月就嚟開始喇！記得話畀屋企人同朋友知，你決心戒煙！喺戒煙路上，你絕不孤單，身邊所有人都一定會支持你！

我哋亦會透過Facebook專頁分享戒煙資訊、提供戒煙貼士同埋提醒大家點解要堅持戒煙，陪你渡過呢個無煙月。

快打戒煙熱線1833 183預約免費戒煙服務！

【堅持無煙四星期】

你一定要知！吸煙者堅持無煙四星期，徹底擺脫煙癮嘅成功率高五倍！

戒煙頭幾日退癮徵狀最明顯，戒煙藥物幫到你！不如領取1星期免費戒煙藥物試用裝，試下戒煙！你只需親身到社區藥房、戒煙診所、地區康健中心或地區康健站，就可以即時免費領取一星期戒煙藥物。

除咗有戒煙藥物，仲有中醫戒煙耳穴貼畀你選擇，一定可以幫到你！食緊煙嘅朋友如果想試下，可前往指定中醫戒煙診所，就可以即時免費領取戒煙耳穴貼，減輕退癮徵狀。

你只須前往貼有綠色「一星期戒煙藥物試用裝」標誌或橙色「中醫戒煙耳穴貼」標誌嘅地點，開啟「戒煙達人」應用程式內選擇相關嘅指定「領取地點」，通過簡單評估，用手機App掃描二維碼，就可以即時免費領取一星期戒煙藥物（尼古丁替代療法）試用裝或中醫戒煙耳穴貼，快啲下載「戒煙達人」手機App喇！

【免費1星期戒煙藥物 + 中醫戒煙耳穴貼全面幫你戒煙】

食緊煙嘅朋友一定要知！吸煙者堅持無煙四星期，徹底擺脫煙癮嘅成功率高五倍！

戒煙有好多方法，大家可能試過自行購買同使用戒煙藥物，即尼古丁替代療法，但覺得幫助不大。事實上，正確使用戒煙藥物係十分重要。一般戒煙藥物療程需8至12星期，而戒煙診所會因應吸煙者嘅煙癮程度，結合長效及短效嘅尼古丁替代療法，大大提高戒煙成功率。

尼古丁替代療法係既安全又有效嘅輔助戒煙方法，用嚟紓緩退癮徵狀，減少煙癮，所以我哋非常鼓勵煙癮深嘅朋友使用。

除咗有戒煙藥物，亦有中醫戒煙耳穴貼畀你選擇，一定可以幫到你！

戒煙耳穴貼好處包括安全、副作用少，而且易操作。食緊煙嘅朋友如果想試下，可直接前往中醫戒煙診所領取戒煙耳穴貼。

快打戒煙熱線1833 183預約免費戒煙服務，接受戒煙藥物或中醫戒煙耳穴貼配合輔導治療喇！

領取地點：
戒煙藥物 – https://www.livetobaccofree.hk/pdfs/locations_1_nrt.pdf
中醫戒煙耳穴貼 – https://www.livetobaccofree.hk/pdfs/locations_2ear.pdf

【戒煙達人 +「智聊戒 Chat To Quit」陪著你戒煙】

「戒煙達人」
如果你每日只係食幾支煙，未必一定需要用戒煙藥物，可以試下用「戒煙達人」應用程式幫自己戒煙。「戒煙達人」可以幫你訂下戒煙計劃、評估一下自己對尼古丁嘅依賴程度同記低戒煙進度，仲可以參考入面嘅戒煙資訊同貼士，幫你實現無煙生活。

「智聊戒 Chat To Quit」
今年仲有「智聊戒 Chat To Quit」，由衞生署資助、香港大學護理學院推出嘅AI戒煙輔導服務，可以隨時隨地同AI戒煙輔導員聊天，全天候即時提供支援同建議，無需等候，即時助你應對每個「想食煙」嘅辛苦時刻。Chat To Quit仲會根據你嘅吸煙習慣，提供個人化戒煙策略，而且無需面對面，免卻尷尬，可以話係舒適同無壓力戒煙，立即用 WhatsApp 傳送訊息到 6335 9345登記，搵佢傾下啦。

【世界無煙日】

今日係世界無煙日，世衞將今年嘅主題定為「戳穿誘惑：對抗煙草和尼古丁成癮」。煙草商為咗擴大消費群，開發新產品引誘下一代去嘗試，同時又以設計同字眼去欺騙你。聰明嘅你要知道，乜嘢煙都有害，千祈唔好畀煙草商矇騙或呃到，立即戒煙！

戒煙前不如先為自己做好準備，定一個適合自己嘅戒煙日，例如揀一個較少壓力嘅日子，避開一啲重要嘅工作或限期，令你更容易處理可能出現嘅退癮徵狀。你亦可以定喺聽日6月1號開始，我哋會陪你一齊渡過「六月．戒煙月」。

另外，你可以嘗試諗一諗平日自己食煙嘅習慣，例如會唔會喺起身或食飯後，或心煩時候想食煙？要成功戒煙，首先要了解自己食煙嘅習慣同誘因，制定對應方法去對抗煙癮，例如避免呢啲情境、分散注意力、做下伸展運動或跑步等。

決定戒煙後就下定決心同煙斷絕關係，唔買、唔食，仲要一次過掉晒所有打火機同煙灰缸。鼓勵自己，我會堅持同努力！

【西醫戒煙輔導 ＋ 藥物支援 (附「寄住戒計劃」) 】

衞生署資助東華三院、基督教聯合那打素社康服務同博愛醫院為香港居民提供免費戒煙服。戒煙藥物療程一般需8至12星期，由專業人士提供戒煙輔導、藥物資訊及處理退癮徵狀嘅技巧；配合經臨床測試嘅戒煙藥物（如尼古丁替代療法），可以有效對抗煙癮。

服務更設有 「寄住戒計劃」 —— 免費將戒煙藥物郵寄到屋企，仲有電話跟進，唔使出街都可以輕鬆戒煙。

為自己健康着想，立即戒煙啦！

【中醫針灸戒煙 - 助你舒適戒煙】

衞生署資助博愛中醫、東華三院中醫、基督教聯合那打素社康服務中醫同香港大學中醫藥學院為香港居民提供免費戒煙服務。

中醫針灸戒煙能調理身體機能、宣通肺氣、鎮靜安神、亦可刺激增加多巴胺水平，有助改善戒煙初期引致嘅身體不適。

超過八成戒煙人士反映，接受針灸療程後，明顯減輕頭暈、頭痛、易發怒、疲倦、心情不安、渴望食煙、食欲大增、難以入睡、難以集中精神等退癮症狀。若戒煙人士再勤力啲，平日多啲按壓穴位同耳穴，成效更顯著！中醫戒煙服務點超過200個，遍佈全港，就腳方便，可以致電預約或上網登記。

【繼續遠離支煙！】

恭喜你戒咗煙8日！繼續努力，堅持落去！

如果囉囉攣、心思思想食返煙，試下停一停，深呼吸。然後飲杯水。仲想食嘅話，可以用3至5分鐘做伸展運動、聽首歌，或者做其他事分散注意力去克服心癮！

你亦可以將戒煙糖、戒煙香口膠或者無糖香口膠放喺檯面、手袋、衫或褲袋嗰啲顯眼或者容易攞到嘅地方，如果囉囉攣想食煙嘅時候，就隨時攞出來食。為自己而努力，身邊所有人都一定會支持你。

【我愛無煙工作間】

衞生署資助九龍樂善堂提供外展戒煙服務，可以安排專業人士到你哋公司推廣「愛．無煙」計劃，即場提供免費健康講座同推廣戒煙療程，服務多樣化，助你推廣無煙工作間。

戒煙者會由專業人士提供戒煙輔導、用WhatsApp互動跟進、仲會發戒煙小貼士短訊畀你，助你輕鬆戒煙。仲食緊煙嘅你，下定決心立即戒煙啦！

【流動戒煙車 - 助你靈活、便利地戒煙】

好消息！無論你選用西醫或中醫方法去戒煙，總有一架流動戒煙車喺附近，好處係可即場提供一站式服務，包括戒煙評估、諮詢、輔導、藥物或針灸服務，省去預約同前往診所嘅時間，超過200個服務點遍佈全港，就腳方便。

【戒煙小貼士】

在戒煙過程中，你會不時面對煙癮嘅挑戰，可能感到心煩、急燥、精神緊張，想食返支煙。試下停一停，深呼吸，並將手放喺小腹上，閉上眼睛，慢慢地專注於一呼一吸；做三至五次，令自己放鬆身心，食煙嘅衝動就會消失，亦可重新集中注意力。

繼續堅持同努力落去！喺戒煙路上，你絕不孤單，身邊所有人都一定會支持你！

【努力堅持，唔再食煙！】

你一定要知道：
戒煙1日，血壓、心跳和體內一氧化碳已經回復正常水平。
戒煙2日，味覺同嗅覺開始恢復。
戒煙2 - 4星期，肺功能正慢慢恢復，呼吸亦越來越順暢。

如果你已經2個星期冇食煙，就要讚下自己，我做得到！因為的確唔容易，嗰種滿足感同成功感，令自己唔會再食返煙。鼓勵自己要繼續努力、堅持落去，一支都唔好食！

【戒煙小貼士 -「智聊戒 Chat To Quit」】

今年仲有「智聊戒 Chat To Quit」，由衞生署資助、香港大學護理學院推出嘅AI戒煙輔導服務，可以隨時隨地同AI戒煙輔導員聊天，全天候即時提供支援同建議，無需等候，即時助你應對每個「想食煙」嘅辛苦時刻。Chat To Quit仲會根據你嘅吸煙習慣，提供個人化戒煙策略，而且無需面對面，免卻尷尬，可以話係舒適同無壓力戒煙，立即用 WhatsApp 傳送訊息到6335 9345登記，搵佢傾下啦。

【分享使用「智聊戒 Chat To Quit」成功戒煙經驗】

第16屆「戒煙大贏家」季軍得主盧先生分享佢自細接觸煙草，九歲已經開始吸煙。大個咗投身建造業，更一度誤以爲吸煙係一種減壓方法。舊年，佢做身體檢查時發現健康出現警號，醫生亦警告佢應該及早戒煙。機緣巧合下，佢參加咗「戒煙大贏家」，仲用咗香港大學護理學院嘅人工智能聊天機械人，有聊天機械人嘅情緒支援同窩心提示，鼓勵佢堅持戒煙初心，最後成功拒絕誘惑並擺脫煙癮。佢覺得人工智能聊天機械人非常有效，亦會推廣俾其他工友。

【一星期戒煙藥物 + 中醫戒煙耳穴一定幫到你戒煙！】

恭喜你戒咗煙四星期，徹底擺脫煙癮嘅成功機率高達五倍！

仲食緊煙嘅朋友不可不知，戒煙頭幾日退癮徵狀最明顯，戒煙藥物幫到你，不如領取1星期免費戒煙藥物試用裝，試下戒煙！你只需親身到社區藥房、戒煙診所、地區康健中心地區康健中心或地區康健站，就可以即時免費領取一星期戒煙藥物。

除咗有戒煙藥物，仲有中醫戒煙耳穴貼畀你選擇，可前往指定中醫戒煙診所，就可以即時免費領取戒煙耳穴貼。

「戒煙達人」陪著你戒煙
如果每日只係食幾支煙嘅你，唔一定需要用戒煙藥物，可以試下用「戒煙達人」應用程式幫自己戒煙。「戒煙達人」可以幫你訂下戒煙計劃、評估一下自己對尼古丁嘅依賴程度同記低戒煙進度，仲可以參考入面嘅戒煙資訊同貼士，一定可以幫到你。

【享受無煙時刻】

戒咗煙嘅朋友，你終於可以同後巷、垃圾桶、煙灰缸講分手喇！你做得好好！就趁今日，同你嘅家人或朋友享受相處無煙每一刻，同家人朋友食飯唔使趕住走開「食支煙」，將本來用嚟食煙嘅時間，變成陪伴摯愛嘅黃金時光。

如果今個月你仲未戒到煙，或者中途有少少「跣腳」，都唔緊要。搵人傾下、用「戒煙達人」應用程式、打 1833 183綜合戒煙熱線，下一個成功故事可以就係你。