六月‧ 戒煙月

戒煙第一天

六月戒煙月開始喇！恭喜你，你已成功行出第一步！記得話畀屋企人同朋友知，你決心戒煙。喺香港，超過8成半吸煙人士都係自行戒煙。如果你需要支援，我哋都有好多戒煙方法幫到你！你亦可請教戒咗煙嘅朋友。如果你嘅朋友都吸煙，最好叫埋佢哋同你一齊戒！

喺香港，每100人就有91個係從未吸煙或成功戒煙人士，歡迎你加入呢個無煙大家庭！

戒煙第二天

唔食煙一日，血壓、身體內一氧化碳已經回復正常水平。繼續努力！

戒煙第三天

近3年因戴口罩而戒咗煙或減少吸煙嘅你一定要堅持落去，唔好再食啦！如果囉囉攣想食番，試下首先停一停，等一等，然後深呼吸。如果仲想食，可以花5－10分鐘做伸展運動，飲一杯清水、或者做其他事分散注意力去克服心癮！

戒煙第四天

煙草煙霧含7000多種化學物質和69種致癌物。這些有害化學物質會損害真皮內嘅微絲血管及破壞毛囊DNA，影響毛髮生長周期。研究顯示，每天吸20支或以上傳統煙嘅男性吸煙者脫髮風險較非吸煙者增加134％。

吸煙不單損害健康，亦帶來脫髮煩惱，有吸煙習慣嘅男士應盡早戒煙！

戒煙第五天

停煙或戒煙時難免經歷退癮徵狀， 例如焦慮和精神不振。你可能會錯誤地認為吸煙有助緩解此徵狀。事實是，徹底戒煙才會完全打破煙癮惡性循環。通過戒煙，你嘅心理健康亦會得到改善。 不如打1833 183 搵我哋傾下？

煙癮深嘅朋友戒煙頭幾日退癮徵狀最明顯，戒煙藥物幫到你！不如領取1星期免費戒煙藥物試用裝，以便舒緩退癮徵狀，試下戒煙！

你只需下載戒煙達人應用程式，並親身前往貼有一星期戒煙藥物試用裝標貼的指定社區藥房、預約戒煙診所或地區康健中心/站，就可以即時免費領取一星期戒煙藥物。

戒煙第六天

加熱煙同傳統煙尼古丁含量相若，所以同樣容易令人上癮。現有數據已顯示加熱煙產生嘅煙霧含有最少 80 種屬加熱煙獨有或比傳統煙更多嘅化學物質，包括致癌物。所以戒煙期間千祈唔好用加熱煙，否則前功盡廢！

戒煙第七天

戒煙時，盡量避免飲用酒精或含咖啡因嘅飲品。我哋建議轉飲水，可以加一、兩片新鮮檸檬或橙喺水内，可帶來清新感覺，令你精神為之一振。你亦可以食健康既小食，例如蘋果、香蕉、青瓜條、車厘茄、烘烤堅果等，滿足口癮。

戒煙第八天

吸煙減少腦細胞血液和氧氣供應，導致細胞損害及死亡。根據多項綜合研究，吸煙者有認知障礙症（俗稱老年癡呆症）及阿茲海默症的機會較非吸煙者高3至4成，風險更隨着每日吸煙量增加！戒煙事不宜遲！

戒煙第九天

煙草有毒物質會令口腔組織和骨骼慢性發炎，同時抑制免疫細胞功能及妨礙自我修復，因而增加牙周病風險同引致口臭，仲會增加植牙手術失敗率！

想牙齒健康同避免提早冇牙，唔好再食煙！

戒煙第十天

研究顯示，每日吸煙量高嘅人，舌頭上嘅味蕾數目會減少，令味覺變得遲鈍。戒煙可以逆轉呢個情況。通常戒煙2日後，味覺同嗅覺就會開始恢復，大約數個月後就會回復正常水平。

冇食10日煙，你嘅味覺、嗅覺應該越嚟越敏銳！不如諗定今個weekend食乜好～

戒煙第十一天

食煙唔止唔見錢，連精子都少啲 😫

研究顯示，吸煙可損害精子DNA，令精子形態及活動力異常。吸煙者精子過少風險較非吸煙者高29%，影響生育健康！戒煙啦！

戒煙第十二天

你可以將你的戒煙理由及困難一一記下來，還有把阻礙你戒煙的人和情境、以及你如何克服及從中得到的經驗和教訓結集成為「一覽表」。當你覺得戒得辛苦嘅時候可以睇番，提醒自己。

戒煙嘅過程唔容易，你可以不時給自己一些小獎賞，如食一頓豐盛的晚餐，鼓勵自己要堅持落去！繼續加油！

戒煙第十三天

煙草煙霧會破壞肺部纖毛細胞，以致肺部不能有效清除黏液分泌及當中的細菌、塵埃等外來物，削弱免疫細胞的殺菌功能。一旦感染新冠病毒，更會增加成為重症患者及死亡風險！請立即戒煙！

戒煙第十四天

吸煙導致血液中嘅一氧化碳含量急升，阻礙氧氣被輸送到肌肉同其他身體組織，令運動表現同耐力下降。要提升運動量同表現，首先要戒煙!

戒煙後2星期⾄4個月內，循環系統同肺功能已得到改善。有研究顯示，戒煙短短14日，已經能夠改善肌肉對抗疲勞嘅能力。戒煙後2年，運動表現會有更顯著嘅提升。

想盡情享受運動帶來嘅樂趣？立即戒煙！

戒煙第十五天

吸煙破壞卵巢細胞，影響卵子受精及受精卵植入子宮，降低生育能力 !

大量研究顯示，吸煙者比非吸煙者高 3 倍機會需要嘗試超過1 年才能成功懷孕，風險亦隨吸煙量上升。另外，流產風險亦高2至3成。有計劃迎接小生命嘅女士快啲戒煙啦！

戒煙第十六天

吸煙導致胰臟細胞發炎，尼古丁亦抑制胰島素的正常釋放，因而導致糖尿病。

綜合研究分析顯示，吸煙者比非吸煙者患上糖尿病的風險高3成。唔想咁？ 戒煙啦！

戒煙第十七天

吸煙破壞陰莖海綿體血管細胞，影響勃起功能。綜合國際多項研究的回顧發現，男性吸煙者患上勃起功能障礙的比率較非吸煙者高五成，而在本地和內地進行的研究亦發現類似結果。

患上勃起功能障礙的風險更與每日吸煙數量有明顯關連。內地研究發現，每日吸煙多過20支，患上勃起功能障礙比率與非吸煙者相比，高約六成半。

吸煙影響生育健康和生活質素。為避免吸煙對性功能造成永久損害，有吸煙習慣的男士應盡早戒煙！

戒煙第十八天

父親節快樂！為父親送上健康呢份無價嘅禮物，鼓勵佢戒煙啦！

戒煙第十九天

三手煙係喺吸煙後，殘留喺衣物、身體同家居物品表面嘅尼古丁同其他有害物質，例如鉛同致癌物等。呢啲物質會殘留數日至數星期，一般清潔劑無法清除，更會透過呼吸同皮膚進入體內。

兒童吸食二手煙亦會增加患上癌症、中耳炎、下呼吸道疾病、嚴重哮喘嘅風險。

只有戒煙先可以保護家人免受二手煙同三手煙嘅影響，亦可以避免身上殘留難聞氣味。

為子女健康著想，戒煙啦！

戒煙第二十天

煙草煙霧嘅毒素令皮膚細胞氧化，以致提早衰老，食乜、搽乜都補唔返！

吸煙亦會增加子宮頸癌、提早更年期1至4年、骨質疏鬆症和不孕等風險。

對自己好，你要戒煙！

戒煙第二十一天

煙草嘅尼古丁同重金屬鎘對骨骼細胞有直接毒性作用，並降低吸收鈣和維他命D，增加骨質疏鬆風險。另外，吸煙提前更年期1至4年，令鈣質加速流失。

綜合研究顯示，吸煙者髖部骨折風險比非吸煙者高8成。想老咗骨骼健康，行動自如？咁就盡早戒煙！

戒煙第二十二天

恭喜你戒咗煙3星期！你嘅肺功能正慢慢恢復，同埋你呼吸會越來越順暢。趁住今日端午節，好好享受游龍舟水或扒龍舟，遠離煙支！

戒煙第二十三天

綜合研究指出，相比唔食煙嘅人，每日食一枝煙中風風險高2成，而冠心病嘅風險亦高4成。而呢一支煙帶來嘅風險已經相當於每日一包煙嘅一半！

純粹減煙無助減低吸煙引致嘅疾病及死亡風險。戒煙要徹底，一枝都唔好食！

戒煙第二十四天

戒煙除咗對身體好，亦可以幫你慳錢！香港工資中位數係$19,100，如果你每日花$72買一包煙，一年就要$26,280，即係每年只出11個月糧咋🙁

立即戒煙 拯救荷包！

戒煙第二十五天

吸煙減低視網膜細胞自我修復能力，日久增加對眼睛結構嘅損害。研究顯示，吸煙增加視力衰退及老年性黃斑點退化風險2至3倍。

另外，煙霧中嘅重金屬鉛同鎘直接破壞眼部晶體、降低抗氧能力，增加白內障風險2至3倍。想保護視力？立即戒煙！

戒煙第二十六天

水煙嘅煙草及助燃碳釋出大量有毒化合物，包括一氧化碳、重金屬、焦油同致癌物。吸食一小時水煙所吸入嘅煙霧可以相當於傳統煙嘅100至200倍！因此，水煙使用者吸入嘅有毒物質份量比吸食傳統煙更多。

水煙組件難以在每次使用後徹底消毒。研究發現使用水煙器具增加感染疱疹、肺癆及肝炎等風險。千祈唔好食呀！

戒煙第二十七天

吸煙增加患上認知障礙症、髖骨折和白內障等疾病風險。 即使60歲以後戒煙，同樣有即時及長遠嘅裨益。

戒煙永遠唔會遲！立刻戒煙！

戒煙第二十八天

如果你已經四個星期冇食煙，就已經捱過咗尼古丁引致嘅退癮徵狀。日後若有環境因素挑起你嘅心癮，你一定要記得今日嘅堅持同努力，唔好再食番。

要避免誘惑，身邊有人叫你食煙一定要堅拒，亦要避免去有人食煙嘅場合。

戒煙第二十九天

戒咗煙既朋友，你終於可以同後巷和垃圾桶講分手喇！自己嘅人生應該想點就點！

戒煙第三十天

就趁今日，同你嘅家人或朋友享受相處嘅無煙時刻～