六月‧ 戒煙月

［六月。戒煙月］

六月戒煙月就嚟開始喇！記得話畀屋企人同朋友知，你決心戒煙！喺戒煙路上，你絕不孤單，身邊所有人都一定會支持你！

我哋亦會喺嚟緊幾星期每日提供戒煙貼士同埋提醒大家點解要堅持戒煙，陪你渡過呢個無煙月！

快打戒煙熱線1833 183預約免費戒煙服務！

【免費1星期戒煙藥物】

食緊煙嘅朋友一定要知！吸煙者堅持無煙4星期，徹底擺脫煙癮嘅成功機會可以高5倍！

戒煙有好多方法，大家可能試過自行購買及使用戒煙藥物，即尼古丁替代療法，但覺得幫助不大。事實上，正確使用戒煙藥物係十分重要。一般戒煙藥物療程需8至12星期，而戒煙診所會因應吸煙者嘅煙癮程度，結合長效及短效嘅尼古丁替代療法，大大提高戒煙成功率。

尼古丁替代療法係既安全又有效嘅輔助戒煙方法，用以紓緩退癮徵狀，減少煙癮，所以我哋非常鼓勵煙癮深嘅朋友使用呢種戒煙方法。快打戒煙熱線1833 183預約免費戒煙服務，接受戒煙藥物配合輔導治療！

【免費戒煙耳穴貼】

食緊煙嘅朋友一定要知！堅持無煙4星期，能徹底擺脫煙癮嘅成功機會可以高5倍！煙癮深嘅朋友，戒煙頭幾日退癮徵狀最明顯，今年除咗有戒煙藥物，亦新加咗中醫戒煙耳穴貼畀你選擇，一定可以幫到你！

戒煙耳穴貼好處係安全、無痛楚、副作用少、而且易操作。食緊煙嘅朋友如果想試下，可直接前往博愛中醫診所，無需預約。通過簡單評估後，使用戒煙達人手機App掃描二維碼，便可以接受不多於2星期嘅戒煙耳穴治療，你亦可致電 1833 183搵我哋了解一下。

【戒煙小貼士 - 唔好以為食少啲煙就冇事！】

綜合研究指出，相比唔食煙嘅人，那怕你每日食一支煙，你嘅中風風險會比唔食煙嘅人高2成，而患冠心病嘅風險亦會高4成。或者咁講，呢一支煙帶來嘅風險已經相當於每日一包煙嘅一半！

純粹減煙無助減低吸煙引致嘅疾病及死亡風險。戒煙要徹底，一支都唔好食！

【戒煙小貼士 - 下載「戒煙達人」】

如果每日只係食幾支煙嘅你，唔一定需要用戒煙藥物，可以試下用「戒煙達人」應用程式幫自己戒煙。「戒煙達人」可以幫你訂下戒煙計劃、評估一下自己對尼古丁嘅依賴程度及記低戒煙進度，同埋參考入面嘅戒煙資訊同貼士，一定可以幫到你。

【戒煙小貼士】

戒煙前你先為自己做好準備，定一個適合自己嘅戒煙日，例如揀一個較少壓力嘅日子，避開一啲重要嘅工作或限期，令你更容易處理可能出現嘅退癮徵狀。你亦可以定喺6月1號開始，我哋會陪你一齊渡過「六月．戒煙月」。

另外，你可以嘗試諗一諗平日自己食煙嘅習慣，例如會否喺起床或食飯後或心煩時候食煙？要成功戒煙，首先要了解自己食煙嘅習慣同誘因，制定對應方法去對抗煙癮，例如避免呢啲情境或讓自己分散注意力，做下伸展運動、原地踏步或跑步等。

決定戒煙後就下定決心同煙斷絕關係，唔買、唔食，仲一次過掉哂所有打火機同煙灰缸，鼓勵自己，我會堅持同努力！

【家人全力支持你！】

知道你會戒煙，屋企人同朋友都會好開心。希望你戒煙成功，屋企上下每一個都撐你，堅持落去，繼續努力，你會做得到！

【世界無煙日】

今日係世界無煙日，世衛將今年嘅主題定為「保護兒童免受煙草業干擾」。

煙草商為咗引誘兒童和青少年吸煙，喺煙草產品入面加咗不同味道嘅添加劑，例如糖果、水果或薄荷味去掩蓋煙草煙霧的刺喉感，仲會用「順喉」呢啲形容味道嘅字眼，又包裝到五顏六色或印有圖像去增加產品的吸引力，吸引兒童和青少去買。

有研究顯示，煙草產品裏面加咗添加劑會令人降低對煙草產品危害的判斷。研究亦證實，添加薄荷味道的煙草產品會令人增加對尼古丁嘅依賴，而且令戒煙成功率降低。即使成功戒煙，也較容易食番煙。聰明嘅你，千祈唔好俾煙草商呃到！

仲想知多啲煙草商有咩招數? 可以去呢個網頁睇下：https://www.who.int/zh/news-room/questions-and-answers/item/tobacco-related-industry-tactics-to-attract-generations。

【戒煙月開始喇！】

六月戒煙月開始喇！恭喜你，你已成功行出第一步！記得話畀屋企人同朋友知，你決心戒煙。如果你需要支援，我哋都有好多戒煙方法幫到你！你亦可請教戒咗煙嘅朋友有咩戒煙心得。如果你啲家人同朋友都食煙，最好叫埋佢哋同你一齊戒煙，仲可以互相支持同鼓勵，堅持落去，一枝都唔好食！

喺香港，每100人就有超過90個係從未吸煙或成功戒煙人士，歡迎你加入呢個無煙大家庭！

【努力堅持，唔再食煙！】

唔食煙一日，血壓、心跳和體內一氧化碳已經回復正常水平。繼續努力！

【繼續遠離煙支！】

恭喜你戒咗煙3日！繼續努力，堅持落去！

如果囉囉攣、心思思想食番煙，試下停一停，深呼吸，然後飲杯水。如果仲想食的話，可以用3－5分鐘做伸展運動，聽首歌、或者做其他事分散注意力去克服心癮！

你亦可以將戒煙糖/香口膠或者無糖香口膠放在檯面、手袋、衫或褲袋嗰啲顯眼或者容易攞到嘅地方，如果囉囉攣想食煙嘅時候，就隨時攞出來食。為自己而努力，身邊所有人都一定會支持你。如果需要協助，可以打1833 183 搵我哋傾下。

衞生署綜合戒煙熱線1833 183
想知道更多戒煙資訊，可以瀏覽網站：https://www.livetobaccofree.hk/
下載戒煙達人應用程式，到貼有標誌的社區藥房、戒煙診所和地區康健中心／站，領取尼古丁替代療法試用裝或中醫戒煙耳穴貼 https://www.livetobaccofree.hk/tc/free-quit-tools/download-quit-app.html

［中醫針灸戒煙 - 助你舒適戒煙］

中醫針灸戒煙能調理身體機能、宣通肺氣、鎮靜安神、亦可刺激增加多巴胺水平，有助改善戒煙初期引致嘅身體不適。超過八成戒煙人士反映，接受針灸療程後，明顯減輕頭暈頭痛、易發怒、疲倦、心情不安、渴望食煙、食欲大增、難以入睡、難以集中精神等退癮症狀。再配合平日自行按壓穴位同耳穴，成效更顯著。想了解多啲，致電 1833 183搵我地傾下。

［戒煙小貼士］

戒煙時，盡量避免飲用酒精或含咖啡因嘅飲品。我哋建議轉飲水，可以加一、兩片新鮮檸檬或橙喺水裏面，帶出清新感覺，一振精神。你亦可以食健康嘅小食，例如蘋果、香蕉、青瓜條、車厘茄、烘烤堅果等，以解口癮。

［戒煙小貼士］

在戒煙過程中，你會不時面對煙癮嘅挑戰，可能感到心煩、急燥、精神緊張，想食番支煙。試下停一停，深呼吸，並將手放在小腹上，閉上眼睛，慢慢地專注於一呼一吸；做三至五次，讓自己放鬆身心，食煙嘅衝動便會消失，亦可重新集中注意力。

繼續堅持同努力落去！喺戒煙路上，你絕不孤單，身邊所有人都一定會支持你！你亦可以打1833 183 搵我哋傾下。

［戒咗煙7日啦！］

恭喜自己、讚賞自己，成功戒咗煙7日啦！戒煙過程絕不容易，你可以不時畀自己一啲小獎勵，例如食個豐盛嘅晚餐，鼓勵自己要繼續努力、堅持落去，一枝都唔好食！

［提醒自己戒煙嘅初心］

你可以將你戒煙嘅理由、困難同埋心路歷程一一記低，仲有將阻礙你戒煙嘅人同情境、你點樣克服、以及從中得到嘅體驗集成「備忘錄」。當你覺得戒得辛苦嘅時候可以睇番，提醒自己。

戒一定好過唔戒，鼓勵自己要堅持落去！繼續加油！

［戒煙小貼士］

趁著今日星期天去行山、做運動、陪下家人或者讓自己好好享受假期，繼續遠離支煙！

恭喜你戒咗煙10日！趁住今日端午節，好好享受游龍舟水或扒龍舟，遠離煙支！

【吸煙致癌】

煙草煙霧含7000多種化學物質，當中最少有69種是致癌物。吸煙引致最少12種癌症，包括肺癌、胃癌、子宮頸癌、大腸癌等，不但致命，亦可能帶來長期後遺症，連基本身體機能例如進食和排泄，都可能永久受損。唔想呢啲問題成為你每日生活嘅一部分，立即戒煙吧！

有時無聊或者想食煙，可以做下運動幫自己分散注意力，例如行個圈和做下伸展手腳既運動；亦可以原地踏步、急步快行，或做肌肉訓練等，大約三至五分鐘後，吸煙的衝動便會自然消失。繼續努力，一枝都唔食！

長遠可以養成做運動的習慣，如游水、踏單車、做Gym等，都有助自己戒煙。選擇一種適合自己和喜歡的運動，遠離支煙。

【吸煙危害兒童健康】

兒童吸食二手煙會增加患上癌症、中耳炎、下呼吸道疾病，仲有嚴重哮喘嘅風險!

三手煙就係吸煙後，殘留喺衣物、身體同家居物品表面嘅尼古丁同其他有害物質，例如鉛同致癌物等。呢啲物質會殘留數日至數星期，一般清潔劑無法清除，仲會透過呼吸同皮膚進入體內。 只有戒煙先可以保護家人免受二手煙同三手煙嘅影響，亦可以避免身上殘留難聞氣味。

為子女健康着想，戒煙啦！

【戒煙小貼士】

知道自己心癮又來，立即停一停、深呼吸三至五次，回想一件快樂事，或者可以計劃一下明天的活動，吸煙的衝動便會自然消失，繼續堅持努力，一支都唔食！

【運動耐力上升💪】

吸煙導致血液中嘅一氧化碳含量急升，阻礙氧氣被輸送到肌肉同其他身體組織，令運動表現同耐力下降。要提升運動量同表現，首先要戒煙!

戒煙後2星期至4個月內，循環系統同肺功能已得到改善。有研究顯示，戒煙短短14日，已經能夠改善肌肉對抗疲勞嘅能力。戒煙後2年，運動表現會有更顯著嘅提升，繼續堅持努力戒煙，身邊所有人都撐你！

【鼓勵父親戒煙】

父親節快樂！如果爸爸有吸煙習慣，就為佢送上呢份無價嘅健康禮物，鼓勵佢戒煙啦！

【一次性電子煙極易令人上癮】

外國近年興起一次性不需組裝或充電嘅電子煙，其煙油含極高劑量的尼古丁，高至每支可相當於吸食數百支傳統煙。煙草商用尼古丁鹽作配方，以減低尼古丁的苦味和容易入口，因此可造成極嚴重尼古丁依賴。

另外，近排亦有人非法銷售名為「霧化器」或「口腔噴霧棒」的電子煙產品以混淆視聽。根據香港法例，呢D產品都屬於電子煙。

含尼古丁的電子煙不但不能幫助戒煙，更是高度致癮，兒童和青少年攝入尼古丁會影響腦部發育，並可導致學習障礙和焦慮。此外，電子煙霧含有醛和苯等致癌物，增加患上心臟病和肺病的機會。總之使用任何吸煙產品都對身體有害，千祈咪中計，一支都唔好試！

【戒煙小貼士】

提醒自己，我唔會比支煙控制到。囉囉攣想食煙時，可以切個生果食，或者食無糖香口膠紓緩口癮。同自己講，我會繼續堅持同努力去戒煙。

【吸煙提早更年期 ，提早衰老！】

不可不知，食煙唔止唔見錢，仲會令皮膚變差、牙齒變黃同影響生育能力！唔好以為戒煙可以等吓先，等到有問題出現先去戒煙。其實，食煙係會持續對你身體造成傷害！

日日係咁食煙，煙草煙霧嘅毒素會持續令皮膚細胞氧化，以致提早衰老，塊面又黃又黑，乾到搽乜都補唔返㗎！ 吸煙又會導致不孕、令骨質疏鬆、增加子宮頸癌風險，提早更年期1至4年和引致其他疾病，千祈唔好等到出現問題先嚟後悔。

對自己好，你一定要立即戒煙 ！

【戒煙小貼士】

如果好想食煙，可以去洗個臉、望下盆栽既花花草草、煮下野食、餵下金魚或者同寵物玩下，讓自己分散注意力，又可以克服心癮，遠離支煙。我有信心，我做得到！

【恭喜你21日冇食煙 ，繼續努力！】

恭喜你！21日冇食煙同慳咗2000幾蚊，用嚟買電子用品或家庭電器，都有唔少選擇，又可以買份小禮物獎勵一下自己，繼續堅持同努力！

【繼續遠離煙支！】

恭喜你戒咗煙3星期！

你嘅肺功能正慢慢恢復，你嘅呼吸亦會越來越順暢。繼續堅持同努力，身邊所有人都撐你！

【戒煙小貼士】

想食都唔好攞起支煙，諗下做其他事情，可以唱歌、聽下音樂，大約三至五分鐘的時間，吸煙的衝動便會自然消失，繼續努力，一枝都唔食！

【食煙增加骨質疏鬆風險】

煙草嘅尼古丁同重金屬鎘對骨骼細胞有直接毒性作用，降低身體吸收鈣同維他命D，增加骨質疏鬆風險。另外，吸煙會提前更年期1至4年，令鈣質加速流失。

綜合研究顯示，吸煙者髖部骨折風險比非吸煙者高8成。想老咗骨骼健康，行動自如？咁就盡早戒煙！

【一日一包煙 = 一年白做個半月？】

戒煙除咗對身體好，仲可以幫你慳錢！香港工資中位數係$20,000，如果你每日花近$100買一包煙，一年就要$36,500。換言之，每年就得大約10個半月糧咋😞

立即戒煙 拯救荷包！

【戒煙小貼士 - 食煙影響生育】

不可不知，食煙唔止唔見錢，連精子都少啲！有研究話比我哋知，吸煙會損害精子DNA，令精子形態及活動力異常。吸煙人士精子過少嘅風險比非吸煙者高29%，直接影響生育。想生BB?快D叫老公戒煙啦！

【戒煙永不嫌遲！】

吸煙增加患上認知障礙症(mechanism)、白內障和髖骨折等疾病風險以致影響活動能力。想將來老左仲可以有獨立既活動能力?即使60歲以後戒煙，同樣有即時及長遠嘅裨益。

戒煙永遠唔會遲！叫身邊嘅老友記立刻戒煙！

【要讚下自己】

如果你已經四個星期冇食煙，就要讚下自己，我做得到！因為的確唔容易，個種滿足感同成功感，令自己唔會再食番煙。

【想戒煙就立即行動】

戒咗煙既朋友，你終於可以同後巷和垃圾桶講分手喇！自己嘅人生應該想點就點！

【享受無煙時刻】

就趁今日，同你嘅家人或朋友享受相處嘅無煙時刻～

【日日都係戒煙日！】

雖然過咗「六月．戒煙月」，但仲食緊煙嘅你，日日都可以戒煙！

我哋呢個月已經分享咗戒煙既理由同埋貼士，鼓勵食煙嘅人的起心肝嘗試戒煙。