六月‧ 戒煙月

【世界無煙日】

今日係世界無煙日，世衞將今年嘅主題定為「戳穿誘惑: 揭露煙草和尼古丁製品行業的策略」。

煙草商為咗增加消費群，喺煙草產品加入甜味、水果味、薄荷等添加劑去掩蓋煙草煙霧既刺喉感，仲會用食咗會「順喉」既字眼去欺騙你 ; 又以時尚設計、迷人色彩和誘人口味誘惑你去嘗試。

有研究顯示，煙草產品裏面加咗添加劑會鼓勵市民嘗試和長期吸煙，更會降低吸煙者對煙草產品危害的判斷。研究亦證實，吸食薄荷煙草產品的人士對尼古丁嘅依賴程度增加，戒煙成功率亦會更低。即使成功戒煙，也較容易食番煙。

聰明嘅你要知道，乜嘢煙都有害，千祈唔好俾煙草商矇騙或誘惑到！

【戒煙月開始喇！】

六月戒煙月開始喇！恭喜你，你已成功行出第一步！記得話畀屋企人同朋友知，你決心戒煙。如果你需要支援，我哋都有好多戒煙方法幫到你！你亦可請教戒咗煙嘅朋友有咩戒煙心得。如果你啲家人同朋友都食煙，最好叫埋佢哋同你一齊戒煙，仲可以互相支持同鼓勵，堅持落去，一支都唔好食！

喺香港，每100個人就有超過90個係從未吸煙或成功戒煙人士，歡迎你加入呢個無煙大家庭！

【努力堅持，唔再食煙！】

唔食煙一日，血壓、心跳和體內一氧化碳已經回復正常水平。繼續努力！

【繼續遠離煙支！】

恭喜你戒咗煙3日！繼續努力，堅持落去！

如果囉囉攣、心思思想食番煙，試下停一停，深呼吸。然後飲杯水。仲想食的話，可以用3－5分鐘做伸展運動，聽首歌、或者做其他事分散注意力去克服心癮！

你亦可以將戒煙糖/香口膠或者無糖香口膠放在檯面、手袋、衫或褲袋嗰啲顯眼或者容易攞到嘅地方，如果囉囉攣想食煙嘅時候，就隨時攞出來食。為自己而努力，身邊所有人都一定會支持你。

【中醫針灸戒煙 - 助你舒適戒煙】

中醫針灸戒煙能調理身體機能、宣通肺氣、鎮靜安神、亦可刺激增加多巴胺水平，有助改善戒煙初期引致嘅身體不適。超過八成戒煙人士反映，接受針灸療程後，明顯減輕頭暈頭痛、易發怒、疲倦、心情不安、渴望食煙、食欲大增、難以入睡、難以集中精神等退癮症狀。

再配合平日自行按壓穴位同耳穴，成效更顯著。

【戒煙小貼士】

有時無聊或者想食煙，可以做下運動幫自己分散注意力，例如行個圈和做下伸展手腳既運動；亦可以原地踏步、急步快行，或做肌肉訓練等，大約三至五分鐘後，吸煙的衝動便會自然消失。繼續努力，一枝都唔食！

長遠可以養成做運動的習慣，如游水、踏單車、做Gym等，都有助自己戒煙。選擇一種適合自己和喜歡的運動，遠離支煙。

【戒煙小貼士】

提醒自己，我唔會比支煙控制到。囉囉攣想食煙時，可以切個生果食，或者食無糖香口膠紓緩口癮。同自己講，我會繼續堅持同努力去戒煙。

【戒咗煙7日啦！】

恭喜自己、讚賞自己，成功戒咗煙7日啦！戒煙過程絕不容易，你可以不時畀自己一啲小獎勵，例如食個豐盛嘅晚餐，鼓勵自己要繼續努力、堅持落去，一支都唔好食！

【戒煙小貼士】

趁著今日星期日去行山、做運動、陪下家人或者讓自己好好享受假期，繼續遠離支煙！